ناندیڑ سے جملہ ۲۷۹؍ خوش نصیب عازمین حج کا انتخاب

ناندیڑ۔۲۲؍ اپریل ( اعتماد نیوز):ناندیڑ سے جملہ ۲۷۹؍ خوش نصیب عازمین حج کا انتخاب عمل میں آنے پر خدمت حجاج کمیٹی ناندیڑ کی جانب سے انہیں مبارکباد پیش کی گئی ہے۔امسال ناندیڑسے عام زمرے (General Category)کے تحت ۱۱۳۳؍ عازمین حج میں سے صرف ایک عازم حج کا انتخاب قرعہ اندازی کے ذریعہ عمل میں آیاہے جبکہ ۲۷۸؍ محفوظ زمرے (Reserved Category)کے تمام عازمین حج کا انتخاب عمل میں لایا گیا۔ تفصیلات کے مطابق ممبئی میں مہاراشٹر اسٹیٹ حج کمیٹی کی جانب سے ریاست بھر سے حج کیلئے خواہشمند درخواست گذاروں کے ناموں کے لئے قرعہ اندازی عمل میں آئی۔ اس قرعہ اندازی میں ناندیڑ سے عام زمرے کے تحت قلعہ روڈ کے ساکن رحیم اللہ خان لطف اللہ خان کے نام کا انتخاب عمل میں آیا۔واضح رہے کہ امسال ناندیڑ سے عام زمرے کے تحت ۱۱۳۳؍ عازمین حج نے درخواستیں پر کی تھی ، اس مرتبہ مہاراشٹر سے جملہ ۴۸؍ ہزار ۱۷۷؍ درخواستیں روانہ کی گئی تھی جبکہ مہاراشٹر کے لئے ۷؍ ہزار ۹۰۷؍ کا کوٹہ مختص کیا گیا ہے۔ موصول شدہ درخواستوں میں سے ان درخواستوں کو مسترد کر دیا گیاجن میں سے ضابطہ کی ٹھیک ڈھنگ سے خانہ پوری نہیں کی گئی ایسی درخواستوں کی تعداد



۳۱۰؍ بتائی گئی ہے۔ غور طلب بات یہ ہے کہ مہاراشٹر سے محفوظ زمرے کے تحت تقریباً ۷؍ ہزار۸۷۱؍ سیٹوں کو مختص کیا گیا ہے اس لئے عام زمرے کے لئے مہاراشٹر سے صرف ۳۶؍ نشستوں کے لئے قرعہ اندازی کی گئی۔محفوظ زمرے میں اے اور بی کے تحت ان عازمین حج کو سفر حج کا موقع دیا جاتا ہے جن میں ۷۰؍ سال سے زائد عمر کے حضرات اورجو لوگ مسلسل تین سال سے حج کے لئے درخواست پر کر رہے ہیں، ایسے عازمین حج کی تعداد ناندیڑ سے ۲۷۸؍ ہے۔